Rabitə və informasiya texnologiyaları sahəsində Ümumi Daxili Məhsul istehsalı 1,6 faiz təşkil edib

2012-ci ilin yanvar-fevral aylarında ölkə iqtisadiyyatında 8,0 milyard manatlıq və ya əvvəlki ilin eyni dövrünə nisbətən 0,5 faiz çox ümumi daxili məhsul istehsal edilib.

Dövlət Statistika Komitəsindən verilən məlumata görə, iqtisadiyyatın qeyri-neft sahələrində yaradılmış əlavə dəyərin həcmi əvvəlki ilin eyni dövrü ilə müqayisədə 7,1 faiz artaraq 3,4 milyard manat və ya ÜDM-in 42,6 faizini təşkil etmişdir. Eyni zamanda neft-qaz hasilatı və emalı sahələrində əlavə dəyər istehsalı 4,5 faiz azalıb.

ÜDM-in 60,5 faizi sənayedə, 2,5 faizi kənd təsərrüfatı, meşə təsərrüfatı və balıqçılıqda, 5,0 faizi tikintidə, 6,9 faizi ticarət və nəqliyyat vasitələrinin təmiri üzrə xidmətlər sahəsində, 5,0 faizi nəqliyyat və anbar təsərrüfatında, 1,3 faizi turistlərin yerləşdirilməsi və iaşə xidmətləri sahəsində, 1,6 faizi informasiya və rabitə xidmətlərində, 11,3 faizi isə sosial və digər xidmət sahələrində istehsal edilib.

Bu dövrdə turistlərin yerləşdirilməsi və iaşə xidmətləri sahəsində əlavə dəyər real ifadədə 17,7 faiz, informasiya və rabitə xidmətlərində 14,1 faiz, ticarət və nəqliyyat vasitələrinin təmiri üzrə xidmətlər sahəsində 9,0 faiz, kənd təsərrüfatı, meşə təsərrüfatı və balıqçılıqda 2,8 faiz, nəqliyyat və anbar təsərrüfatında isə 1,6 faiz artıb.

CAHANGİR

---