Dünyanın “ən xoşbəxt” və “ən bədbəxt” ölkələri məlum oldu

Dünyanın “ən xoşbəxt” və “ən bədbəxt” ölkələri müəyyənləşdirilib.2005-2011-ci illəri əhatə edən Dünya Xoşbəxtlik Hesabatına görə, “ən xoşbəxt”  ölkələr sıralamasında Danimarka birinci yerdə qərarlaşıb. Bu kateqoriyada ilk üçlüyü Finlandiya və Norveç tamamlayır. 195 ölkənin iştirak etdiyi anketdə Afrika ölkəsi olan Togo “ən bədbəxt” ölkə kimi qiymətləndirilib. “Bədbəxt”likdə Togonu yenə Afrika ölkələri Benin və Orta Afrika Respublikası izləyir.

İqtisadçı John Helliwell, Richard Layard və Jeffrey Sachs tərəfindən hazırlanan anketdə, vətəndaşların gəlir, təhsil səviyyəsi, sağlamlıq, ictimai imkanları və ümumiyyətlə, həyatlarından məmnun olub-olmadıqları qeyd olunub.
 
 “XOŞBƏXT”LƏRİN GƏLİRİ 40 QAT DAHA ÇOXDUR
 
Hesabatda ölkələrin rifah səviyyəsi düşdükcə xoşbəxtlik səviyyəsinin də azaldığı qeyd edilib. Siyahıda ilk üç sırada qərarlaşan Skandinaviya ölkələrində adambaşı illik gəlir, “ən bədbəxt” 3 ölkədəki illik gəlirdən 40 qat daha yüksəkdir.
 
“BƏDBƏXT”LƏR 28 İL DAHA AZ YAŞAYIR
 
Hesabat başqa bir maraqlı detalı da ortaya çıxarıb. Belə ki, “xoşbəxt” ölkələrdə həyat müddəti “bədbəxt” ölkələrdən 28 il daha çoxdur.
 
Qeyd edək ki, tədqiqatçılar  xoşbəxtlik meyarında iqtisadi tərəqqi ilə yanaşı, azadlıq, qanunlara və dövlətə güvən kimi amillərin də əhəmiyyətli rol oynadığını qeyd ediblər.
 
 

---