Beynəlxalq Rabitə Akademiyasının akademik diplomları təqdim olunub

Bu gün «Happy İnn» otelində Beynəlxalq Rabitə Akademiyasının akademik diplomlarının təqdimetmə marasimi keçirilib. Tədbirdə çıxış edən elmlər doktoru, professor Sirus Abbasbəyli bildirib ki, Azərbaycanda rabitə sahəsində çox böyük işlər görülüb və bu işlər davam etdirilir.

Azərbaycanın Rusiya ilə əlaqələrinin getdikcə inkişaf etdiyini vurğulayan S.Abbasbəyli əlavə edib ki, bu tədbir münasibətlərin daha da inkişaf etməsinə töhfə verəcək.

Sonra çıxış edən Beynəlxalq Rabitə Akademiyasının prezidenti Anastasiya Ositis rəhbərlik etdiyi qurumun Rusiyada gördüyü işlərdən danışıb. Daha sonra ölkəmizdə  rabitə sahəsində görülən işlərə diqqət çəkən qonaq həyata keçirilən tədbirləri yüksək qiymətləndirib.

Tədbir çərçivəsində akademiklərə diplomlar təqdim olunub. Qeyd edək ki, diplomlar Rabitə və informasiya texnologiyaları naziri Əli Abbasova, Namiq Nəsrullayevə, Qəzənfər İmamverdiyevə, Alişan Həsənova, İsbəndiyar Əliyevə, Famil Məmmədova və Əli Tağıyevə verilib.

Təqdimetmədən sonra Moskva Beynəlxalq Rabitə Akademiyasının Bakı filialının yaradılması ilə bağlı səsvermə olub. Təşkilat Azərbaycanda qeydiyyatdan keçdikdən sonra sözügedən QHT-nin fəxri prezidenti seçiləcək. Bu vəzifəyə Rabitə və informasiya texnologiyaları naziri Əli Abbasovun seçilməsi təklif olunub. Bu təklif tədbir iştirakçılarının yekdilliklə səsini qazanıb. Daha sonra filiala prezidentin seçilməsi təklif olunub və Sirus Abbasbəylinin namizədliyi qəbul olunub.

Məlumat üçün bildirək ki, Beynəlxalq Rabitə Akademiyası 30-dan çox ölkədən 300 təşkilatı təmsil edən 1000-dən çox akademiki özündə birləşdirir.


SEYMUR
 
 
 
 
 

---