Bölgələrdə 900-ə yaxın poçt şöbəsi tikilib

«Regionların sosial-iqtisadi inkişafı proqramı ilə əlaqədar olaraq bölgələrdə  900-ə yaxın poçt şöbələri tikilərək əhalinin istifadəsinə verilib». "İCTnews" elektron xəbər xidmətinin məlumatına görə, bu fikirləri «Azərpoçt» MMC-nin baş direktor müavini Sübhan Kazımov söyləyib. O bildirib ki, sözügedən tikinti işlərinə 2004-cü ildən başlanılıb.

S.Kazımov xüsusi olaraq vurğulayıb ki, həmin poçt şöbələri əsasən də ucqar dağ kəndlərində tikilib: «Yeri gəlmişkən, onu da bildirim ki, «Azərpoçt» MMC respublikada ən böyük şəbəkəyə malik olan bir qurum kimi 271 ədəd avtomobil mexanizmi ilə ölkədə poçtun daşınmasını təmin edir.

Respublika daxilində 7 poçt marşrutu var. Onlardan biri hava nəqliyyatı vasitəsi ilə Naxçıvana poçt daşınır, digərləri isə yerüstüdür. Azərbaycan MDB məkanında olan ölkələr arasında poçtun daşınma tezliyinə görə birinci yeri tutur. Bir gün də poçtun daşınması üçün ümumilikdə 23920 km yol qət edilir. Bu da ekvator xəttinin yarısından çoxdur».

S.Kazımov bildirib ki, «Azərpoçt» MMC beynəlxalq pul köçürmələrini həm elektron, həm də poçt vasitəsi ilə həyata keçirir: «Ümumdünya Poçt İttifaqının proqramı vasitəsi ilə Rusiya, Belarus, Qazaxıstan, Ukrayna və Moldova ölkələri ilə, «Wester Union» sisteminə qoşulmuş bütün dövlətlərə, yəni dünyanın hər bir yerinə «Azərpoçt» MMC-nin istənilən məntəqəsindən pul transfer etmək və qəbul etmək olar».


SEYMUR

---