«Azərpoçt» MMC Müstəqil Həmkarlar İttifaqı Komitəsinin «Bakı-2» şöbəsinin III hesabat-seçki konfransı keçirilib

«Azərpoçt» MMC Müstəqil Həmkarlar İttifaqı Komitəsinin «Bakı-2» şöbəsinin III hesabat-seçki konfransı keçirilib.

Konfrans öz işinə başlamamışdan öncə Təriqə Kazımova üzün müddət rabitə sahəsində çalışdığına görə fəxri fərmanla və pul mükafatı ilə mükafatlandırılıb. Bundan sonra «Azərpoçt» MMC Müstəqil Həmkarlar İttifaqı Komitəsinin «Bakı-2» şöbəsinin sədri Eldar Qasımov hesabatla çıxış edib.

O bildirib ki, respublikada köklü iqtisadi və sosial dəyişikliklər bütün ictimai münasibətləri əhatə etməklə, sosial-əmək sahəsinə daha əsaslı təsir göstərir və həmkarlar ittifaqları qarşısında çox ciddi vəzifələr qoyur.

Onun sözlərinə görə, Əmək müqaviləsinin şərtlərinə uyğun nəzərdə tutulmuş öhdəliklərə, Əmək Məcəlləsinə və əmək qanunvericiliyinə aid normativ hüquqi aktların tələblərinə, işçilərin əmək, maddi, sosial-məişət şəraitinin, rifah halının yaxşılaşdırılması üçün müəssisənin nizamnaməsinə və kollektiv müqaviləyə müvafiq olaraq «Azərpoçt» MMC-nin rəhbərliyi ilə birlikdə mühüm işlər görülüb: «Hesabat dövrü ərzində Rabitə və İnformasiya Texnologiyaları Nazirliyi və rabitə işçiləri Müstəqil Həmkarlar İttifaqı Respublika Komitəsi arasında bağlanmış kollektiv sazişə uyğun olaraq «Azərpoçt» MMC struktur bölmələri və onların Həmkarlar İttifaqları komitələri arasında 2 dəfə 2 il müddətinə kollektiv müqavilə bağlanılıb və müvafiq olaraq müqavilənin fəaliyyət müddəti 1 il uzadılıb.

"Əmək şəraitinin yaxşılaşdırılması istiqamətində böyük işlər görülüb. Belə ki, hesabat dövründə 511 ədəd kənd və qəsəbə tipli poçt şöbələri tikilib. Bundan əlavə, 9 yeni poçtamt binası inşa edilib və 55 poçt şöbəsi binası əsaslı təmir olunub.

Binalarda müasir tələblərə cavab verən avadanlıqlar quraşdırılıb. Bu tədbirlər 2000-dən çox işçinin iş şəraitinin yaxşılaşmasına səbəb olub. Bununla yanaşı, əməyin mühafizəsi sahəsində də mühüm işlər görülüb. Məhz buna görədir ki, hesabat dövründə heç bir istehsalat xəsarəti qeydə alınmayıb».

Hesabat dövründə 2 işçinin işdən qeyri-qanuni çıxarılması ilə bağlı araşdırma aparıldığını vurğulayan E.Qasımov deyib ki, məsələ dəqiqləşdirildikdən sonra Q.Bəybalayevin tapşırığı ilə onlar işlərinə bərpa olunublar. O əlavə edib ki, Ümumdünya Poçt İttifaqının proqramına uyğun olaraq, Təhsil Nazirliyi ilə birlikdə respublika məktəbliləri arasında hər il inşa müsabiqəsi keçirilib.

Bundan əlavə, hər il 9 oktyabr Ümumdünya Poçt İttifaqının yaranma günündə fəaliyyəti ilə fərqlənən işçilərə fəxri fərmanlar və pul mükafatları verilib: «RİTN, RİMHİRK və «Spartak» idman cəmiyyəti rabitə işçiləri arasında «Sağlamlıq» devizi altında spartakiada keçirilir. «Azərpoçt» MMC-nin də idmançıları uğurla çıxış edib və fəxri fərman, eləcə də pul mükafatına layiq görülüblər».

Sonra «Azərpoçt» MMC-nin İnsan resursları şöbəsinin müdiri Sevil Nəsirova Gender komissiyasının işi ilə bağlı məlumat verib. O bildirib ki, 2004-cü ilin martından Gender bərabərliyi üzrə daimi fəaliyyət göstərən komissiya yaradılıb.

Komissiyanın işçilərin cinsindən asılı olmayaraq hər bir şəxs üçün eyni iş mühiti yaratdığını vurğulayan S.Nəsirovanın sözlərinə görə, görülən işlərin nəticəsi olaraq bir neçə qadın vəzifəyə gətirilib: «Rəhbər vəzifələrdə çalışan qadınlar «Azərpoçt» MMC üzrə 9,6 faiz təşkil edir».
Sonra «Azərpoçt» MMC-nin baş direktoru Qəmbər Bəybalayev çıxış edib. O bildirib ki, Həmkarlar İttifaqı müəssisənin rəhbərliyindən asılı olmayan, tam müstəqil bir təşkilatdır.

Onların qaldırdıqları məsələləri də rəhbərlik həll etməlidir: Rabitə sahəsində bir sıra işlərin görüldüyünü və uğurlu nəticələrin əldə olunduğunu vurğulayan Q.Bəybalayev deyib ki, bu gün bütün iş yerləri müasir avadanlıqla təmin olunub.

Sonda «Azərpoçt» MMC Müstəqil Həmkarlar İttifaqı Komitəsinin «Bakı-2» şöbəsinin tərkibi seçilib:

Qasımov Eldar
Həsənov Abbas
Hüseynov Yunis
Rəsulova Məhluqə
Hüseynova Mehriban
Hüseynova Samirə
Kazımov Şahin
Osmanov Əlövsət
Mikayılov Aydın
Həsənova Sara
Əhmədov Namiq
Muradov Rəşad
Məmmədov Rauf

Sonra «Bakı-2» şöbəsinin rəyasət heyəti seçilib:

Qasımov Eldar
Həsənov Abbas
Hüseynov Yunis
Rəsulova Məhluqə
Hüseynova Mehriban
Hüseynova Samirə
Osmanov Əlövsət

Bundan sonra «Azərpoçt» MMC Müstəqil Həmkarlar İttifaqı Komitəsinin «Bakı-2» şöbəsinin sədrliyinə Eldar Qasımovun namizədliyi irəli sürülüb və o da yekdilliklə yenidən sədr seçilib.

Seymur QASIMBƏYLİ