Şəmkirdə orta məktəblər internetlə təmin olunur

Şəmkirdə əhalinin telefon və multimedia xidmətlərinə olan tələbatının ödənilməsi məqsədilə yeni layihələr həyata keçirilir. Şəmkir Telekommunikasiya Qovşağının rəisi Cavanşir Yusifovun bildirdiyinə görə, rayonun əvvəllər telefonlaşdırılmamış Mahmudlu kəndində 256, Yeni Həyat kəndində isə 512 nömrə tutumlu elektron ATS-lər tikilib.

Kənd ATS-ləri mərkəzlə birləşdirici xətləri optik kabellərlə çəkilib ki, bu da kənd sakinlərinin yüksək keyfiyyətli rabitə xidmətləri ilə təmin edilməsi deməkdir. Bundan başqa rayonda daha 14 kənd ATS-nin birləşdirici xətti optik kabellə təmin olunub.

Rayonda telefon abunəçilərinin sayı 20 minə çatıb. Kənd ATS binaları estetik vəziyyətdə olmaqla tələblərə cavab verir. Rayonda internetə tələbat çox böyükdür. Hal-hazırda genişzolaqlı internet xidmətlərinə böyük tələbat var. Rayon üzrə 100-ə yaxın internet-klub mövcuddur ki, burada gənclər öz asudə vaxtlarından səmərəli istifadə edə bilirlər.

Qovşaq rəisi bildirdi ki, Şəmkir rayonunda orta təhsil müəssisələrinin 21 faizi internetləşib. Məlumata görə, rayonda şagirdlərin müasir texnologiyalardan istifadə etmələri məqsədi ilə 18 orta məktəb internetlə təmin olunub. Hazırda bu işin sürətlə aparıldığı qeyd olunur. Təhsil ocaqlarında kompyuterlərin sayı artırılır.

İnternetlə təmin edilən orta məktəblərin 9-u rayon mərkəzində, 9-u isə kənddə fəaliyyət göstərir.
Məlumata görə, hazırda Şəmkir rayonunda 80 məktəb fəaliyyət göstərir ki, bu təhsil ocaqlarında da 30 minə yaxın şagird təhsil alır. Statistik hesablamalara görə, rayon üzrə 33 şagirdə bir kompyuter düşür.

C.Yusifov daha sonra bildirdi ki, əhalinin telefona olan tələbatının ödənilməsi, onları narahat edən problemlərin daha operativ şəkildə həlli üçün Şəmkir TKQ böyük kənd stansiyalarında abunə şöbələri yaradıblar. Bu layihənin həyata keçirilməsi ilə vətəndaşların hər hansı bir məsələ ilə əlaqədar olaraq rayon mərkəzinə gəlməsinə ehtiyac qalmayıb.

Bu barədə danışan C.Yusifov rabitəni əhaliyə bir qədər də yaxın etmək üçün bu addımı ən optimal variant hesab etdiklərini bildirdi. İllər öncə tamamilə geri qalan Şəmkir TKQ hazırda “Aztelekom” İB-nin ilk 10 qovşağı sırasındadır.

RƏVAN