Müasir texnologiyalara əsaslanan sənaye müəssisələri yaradılacaq

İqtisadi İnkişaf Nazirliyinin Sahibkarlığa Kömək Milli Fondu (SKMF) Mingəçevir şəhərində prioritet hesab olunan sahələr üzrə sahibkarlardan investisiya layihələrinin qəbuluna başlayır. Bununla bağlı SKMF Mingəçevir şəhərində “Sahibkarlığın inkişafına dövlət dəstəyi” mövzusunda tədbir keçirib. “İCTnews” elektron xəbər xidmətinə bu barədə İqtisadi İnkişaf Nazirliyinin mətbuat xidmətindən məlumat verilib.

Nazirlikdən bildirilib ki, tədbir çərçivəsində yerli icra hakimiyyəti orqanlarının nümayəndələri və sahibkarlarla mövcud iqtisadi potensialdan daha səmərəli istifadə edilməsi məqsədilə müzakirələr aparılıb, Sahibkarlığa Kömək Milli Fondu tərəfindən Mingəçevir şəhəri üzrə sahibkarlıq subyektlərindən müvafiq istiqamətlərdə investisiya layihələrinin maliyyələşdirilməsi üçün təkliflərin qəbulu məqsədəuyğun hesab edilib.

Belə ki, fond müasir texnologiyalara əsaslanan müxtəlif sənaye müəssisələrinin yaradılması, kiçik və orta həcmli istixana təsərrüfatlarının, eləcə də kiçik və orta həcmli müasir çörək zavodlarının yaradılmasını dəstəkləyəcək: “Sahibkarlar bu istiqamətli sahələr üzrə nümunəvi layihələri fonddan əldə edə bilərlər.

Sahibkarların istəyinə əsasən, kiçik həcmli investisiya layihələrinin dəyərinin 100 faizədək hissəsi dövlətin güzəştli kreditləri hesabına maliyyələşdiriləcək. Artıq sahibkarlar investisiya layihələrinin maliyyələşdirilməsi məqsədilə müvəkkil kredit təşkilatları vasitəsilə SKMF-yə müraciət edə bilərlər”.
 
HƏQİQƏT

---