«İnternetin inkişafı ilə media strukturunun forması və məzmunu dəyişib»

Moskvada “İTAR-TASS” Agentliyinin təşkilatçılığı ilə Ümumdünya Media Sammiti keçirilib. Sammitdə iştirak edən “Reuters” agentliyinin prezidenti Syuzan Teylor Martin jurnalistlərə bildirib ki, dünya xəbər məkanında müasir texnologiya medianın simasını tədricən dəyişir: “Biz bu dəyişikliyə hazır olmalıyıq. Bu cür toplantılar bizə imkan verir ki, təcrübələrimizi və fikirlərimizi bölüşə bilək.

Əminəm ki, müasir qloballaşan dünyada medianın konkret çağırışları var. Texniki sədlər var ki, biz bu sədləri keçməyi bacarmalıyıq. Bu cür sədləri keçməklə dünyada KİV arasında əməkdaşlığı inkişaf etdirə bilərik”.

“Exo Moskvı” radiosunun baş redaktoru Aleksey Venediktov isə qeyd edib ki, internetin inkişafı ilə media strukturunun forması və məzmunu dəyişib: “Biz jurnalistlər internet mediası və onun dərinlikləri haqda hələ çox az məlumatlıyıq. İnternet 21-ci əsrin çağırışıdır və bu çağırış mövzu olaraq Ümumdünya Media Sammitində müzakirə edilməlidir”.

A.Venediktov sammitdə media resursları ətrafında müzakirələr aparacaqlarını və aktual məsələ kimi internetdə “piratçılıq” mövzusunu müzakirə edəcəklərini söyləyib: “Piratçılığın qarşısını almağın yollarını tapmalıyıq. Çünki piratçılıq digərlərinin fəaliyyətinə mənfi təsir göstərir. Biz bunun mənfi tərəflərinin dəfələrlə şahidi oluruq”.

Məlumat üçün bildirək ki, iki gün davam edən “Dünya mediası: XXI əsin çağırışları” devizi altında keçirilən Ümumdünya Media Sammitində 300-dən çox top-menecer və 103 ölkədən 213 KİV nümayəndəsi iştirak edib.

SEYMUR

---