Ölkəmizin qlobal internet şəbəkəsinə qoşulma sürəti artıb

Cari ilin I yarımilliyində ölkədaxili internet şəbəkəsinin qlobal internet şəbəkəsinə qoşulma sürəti 2009-cu illə müqayisədə 2.7 dəfə artaraq, 40 GB/saniyəyə çatmışdır. Hazırda respublika üzrə hər 100 nəfərə təxminən 30 genişzolaqlı internet istifadəçisi düşür ki, bu da ötən ilin müvafiq dövrü ilə müqayisədə 2.5 dəfəyə yaxın çoxdur.
Bu sıçrayışlı artım ölkənin telefon şəbəkəsinin tam elektronlaşdırılması və genişzolaqlı xidmətlərə çıxış imkanlığının yaradılması, məktəblərin təxminən 90%-nin kompyuterləşməsi və onların 40%-nin internətə çıxışının olması və ən əsası həyata keçirilən effektiv qiymət siyasəti nəticəsində genişzolaqlı xidmətlərin cəmiyyətdə tətbiq səviyyəsinin artımı sayəsində mümkün olmuşdur. Bu səbəbdəndir ki, Beynəlxalq Telekommunikasiya İttifaqının “ICT Price Basket” (“İKT qiymət səbəti”) göstəricisi üzrə Azərbaycan 2009-cu ildəki 99-cu yerdən 2010-cu ildə 46 pillə irəliləyərək 53-cü yerə yüksəlmiş və rabitə tarifləri aşağı salınmış ilk 10 ölkə sırasına daxil edilmişdir.
Bundan başqa, 2011-ci ilin 6 ayı ərzində dünya ölkələrindən Azərbaycana daxil olan beynəlxalq giriş trafikinin həcmi ötən ilin müvafiq dövrü ilə müqayisədə 29,8 mln. dəqiqə artaraq 346,9 mln. dəqiqə, çıxış trafikinin həcmi 7,6 mln. dəqiqə artaraq 83,1 mln. dəqiqə təşkil etmişdir.

---