“Microsoft” şirkəti fayl anbarını yeniləyib

"Microsoft" korporasiyası "SkyDrive" adlı "bulud" fayl anbarını yeniləyib və "Android" platforması üçün "SkyDrive" tətbiqini istifadəyə verib. Yeniliklərin icmalı "Windows"-un rəsmi bloqunda dərc olunub.

"ICTnews.az" elektron xəbər xidməti "lenta.ru" saytına istinadən bildirir ki, yenilənmiş xidmət dizaynı "Windows 8" proqramları stilində hazırlanıb.

"SkyDrive" xidmətində, həmçinin axtarış təkmilləşdirilib; artıq faylların tərkibi üzrə axtarmaq mümkündür. İstifadəçi fayl anbarına yüklədiyi sənəd və fotolara birbaşa brauzerdə baxa bilər.

Qeyd edək ki, "Skydrive" xidməti 2007-ci ilin avqustunda istifadəyə verilib. Xidmət pulsuz olaraq 7 qiqabayt disk sahəsi təqdim edir və pul ödəməklə əlavə yer almaq mümkündür. 2011-ci ilin dekabrında xidmətin "iPhone" və "Windows Mobile" üçün tətbiqləri istifadəyə verilib.

EMİL

---