“Apple” və “Samsung”a sonuncu şans verilib

Hakim Lüsi Kox “Apple” və “Samsung” rəhbərlərinin bir-birlərinə qarşı olan iddialarını sülh yolu ilə həll etməyə çağırıb. O qeyd edib ki, hər iki şirkətin direktoru ən azı telefon danışıqları apara bilərlər. "Sülh bağlamaq vaxtı artıq çatıb" – Lüsi Kox əmindir.

“ICTnews.az” elektron xəbər xidməti “onliner.by” saytına istinadən bildirir ki, hakim vaxtını iki rəqib arasındakı mübahisəyə sərf etmək istəmir. Lüsi Kox bildirib ki, hər iki şirkət məhkəmə hökmünə ümid edirlərsə, o zaman böyük risk edirlər.

Əgər “Apple” və “Samsung” şirkətləri, sadəcə, əqli mülkiyyətləri ilə lovğalanmaq istəyirdilərsə, onda “missiya”nı yerinə yetirilmiş hesab etmək olar. “Apple” və “Samsung” şirkətləri arasında məhkəmə mübahisəsi artıq üçüncü həftədir ki davam edir.

Amerika korporasiyası “iPhone” və “iPad” qurğularının dizaynını köçürdüyünə görə rəqibindən 2,5 milyard dollar həcmində kompensasiya almağı hesablayır.

EMİL

---