Azərbaycan Texniki Universitetində beynəlxalq qrant layihəsi həyata keçirilir

Koreya Beynəlxalq Əməkdaşlıq Agentliyi (KOICA) Azərbaycan Texniki Universiteti ilə (AzTU) birgə  “Təhsil informasiya sisteminin yaradılması layihəsi (2011-2013-cü illər)” çərçivəsində qrant layihəsini həyata keçirir.
Bu qrant layihəsi AzTU-da   akademik təhsilin səmərəsini artırmaq  məqsədilə universitetin idarə olunmasının elektronlaşdırılmasını  və akademik təhsil sisteminin idarə edilməsi üçün lazımi texniki yardımın göstərilməsini əhatə edir.

Sistemin təhlili, layihələndirilməsi, avadanlıqla əlaqədar müzakirələrin aparılması və layihənin  icra edilməsi   məqsədilə dörd   koreyalı mütəxəssis Azərbaycana ezam olunub. Onlar işləri  sentyabrın 14-dək  başa çatdıracaqlar.

Sistemin  yaradılması ilə bağlı işlər tamamlandıqdan sonra  artıq tələbələrin qeydiyyatdan keçmək üçün universitetə  gəlmələrinə ehtiyac qalmayacaq. Bundan başqa, gələcəkdə onların onlayn  yolla  ev şəraitində   universitetin akademik fəaliyyətində  iştirakları mümkün olacaq.
Layihənin ilin sonunadək tamamlanması nəzərdə tutulub.

---