XİN-dən jurnalistlərə internet XƏBƏRDARLIĞI

Xarici İşlər Nazirliyinin (XİN) mətbuat xidməti jurnalistlərə elektron məktub göndərərək nazirliyin informasiya texnologiyalarından yararlanması ilə bağlı məlumat verib. “ICTnews.az” elektron xəbər xidmətinin məlumatına görə, məktubda jurnalistlərin nəzərinə çatdırılır ki, XİN-in mətbuat xidməti Azərbaycanın xarici siyasəti ilə bağlı xəbərlərin ictimaiyyətə daha operativ çatdırılması məqsədi ilə qurumun internet və “Twitter” səhifələrindəki fəaliyyətini aktivləşdirməkdədir.

Belə ki, Azərbaycan Respublikasının xarici siyasətinə aid ən son məlumat və press-relizlər ilkin olaraq XİN-in rəsmi internet və “Twitter” səhifələrində yerləşdiriləcəkdir. «Son məlumatların birbaşa e-mail ünvanınıza operativ göndərilməsi üçün XİN-in internet səhifəsində abunə olmaq bölməsinə e-mail ünvanınızı daxil etmək kifayətdir.

Bundan sonra internet səhifəmizdə yerləşdirilmiş son məlumatlar dərhal sizin e-mail ünvanınıza göndəriləcəkdir. Həmçinin XİN-in “Twitter” səhifəsinin də (@AzerbaijanMFA) izlənilməsi (follow) ilkin məlumatların operativ əldə olunması üçün olduqca vacibdir».



SEYMUR

---