“Panasonic” şirkəti rekord təsvir ölçüsünə malik 145 düymlü televizor yaradıb

Yaponiyanın “Panasonic” şirkəti Almaniyada keçirilən “IFA 2012” sərgisində 7680×4320 təsvir ölçüsünə (30 milyon piksel deməkdir) malik 145 düymlü plazma televizor təqdim edib. Bu format, həmçinin “8K” adlanır.
“ICTnews.az” elektron xəbər xidməti “vesti.ru” saytına istinadən bildirir ki, ekran “Panasonic” şirkəti ilə Yaponiyanın ən böyük “NHK” televiziya şirkəti tərəfindən birgə hazırlanıb.

"Bizim fikrimizcə, “8K” formatı “3D” formatı ilə müqayisədə daha əhəmiyyətlidir, çünki “3D” formatı hazırkı versiyasında məhdud baxış diapazonuna malikdir" – “Ovum” firmasının analitiki Conatan Doran yazıb.

“Gizmag”-dan bloqqerlər nəhəng televizorda təsvirin keyfiyyətinin əla olduğunu bildiriblər. Onlar həm də qeyd ediblər ki, aparat çox parlaq və təbii rəngləri əks etdirir.

Belə televizorların yayılmasında əsas maneə rekord təsvir ölçüsünə malik bu cür ekranlar üçün məzmunun defisit olmasıdır.
 

 

EMİL

---