Metro stansiyalarının tikintisi ilə bağlı ətrafdakı binaların vəziyyəti avtomat elektron taxometr cihazları ilə izlənilir

Hazırda işlər aparılan metro stansiyalarının tikintisi üzrə ətrafdakı binaların vəziyyəti avtomat elektron taxometr cihazları ilə izlənilir. “ICTnews” elektron xəbər xidmətinə bu barədə Bakı Metropolitenindən məlumat verilib.

Qurumdan bildirilib ki, ölkə başçısının 2011-ci ilin mart ayında təsdiq etdiyi Bakı Metropoliteninin konseptual inkişaf sxemi və metro tikintisinə dair dövlət proqramına uyğun olaraq, yaxın 5 il ərzində “Yaşıl xətt”in “Həzi Aslanov-2-Yeni Günəşli” sahəsi də istismara verilməlidir. Bu istiqamətdə uzunluğu 7 km-ə çatan tunellər qazılacaq və 3 stansiya inşa olunacaq.

“Həzi Aslanov-2” stansiyasının yerləşəcəyi ərazidə tikinti işləri plana uyğun olaraq, ilkin mərhələdədir: “Stansiyanın tikintisinin əvvəlki illərdə nəzərdə tutulmayan, lakin sonra inşa olunmuş binaların əhatəsində aparılması yerli sakinlərin narahatlığına səbəb olmuşdu. Lakin tikintinin müasir üsul, qayda və normalara uyğun aparılması ilə bağlı izahatlardan sonra bu narahatlıq aradan qaldırıldı. Binaların vəziyyəti gün ərzində bir neçə dəfə aparılan müşahidələrlə yoxlanılır”.

Burada podratçı qismində svayvurma işlərini yerinə yetirən “Körpü-Bina-Tikinti” şirkətinin “Həzi Aslanov-2” stansiyasının ərazisində müasir ölçmə cihazları ilə təchiz olunmuş laboratoriyası da fəaliyyət göstərir. Ətrafda olan bütün yaxın binalarda monitorinq nöqtələri müəyyən olunub: “Vəziyyət avtomat elektron taxometr cihazlarında əksini tapır.

Ölçmələr davamlı aparılır. Əsas məqsəd binaların təhlükəsizliyidir. Hər məlumat əsasında binalarda deformasiyaların olub-olmadığı müəyyənləşir. Gündəlik akt tərtib olunur, müvafiq təşkilatlara təqdim edilir. Gün ərzində, əsasən, 3 dəfə ölçmə aparılır və əsas məlumatlar bunun üzərində qurulur. Bu günə qədər normadan kənaraçıxma müşahidə olunmayıb. Burada tikinti prosesi tamamlanana qədər bu iş davam etdiriləcək”.

Qurumdan qeyd edilib ki, ümumən, tikinti sahəsində iki cihaz tətbiq olunur. Digər cihazın funksional işi svaylar üzrə aparılan ölçmələrdir: “32 metr dərinliyə qədər vurulan boruların içərisində betonlamadan əvvəl inklinometrlər yerləşdirilir. Qazıntı işlərinə başlanarkən, həmin ötürücülər bu cihaza siqnallar ötürür. Hər yarım metrdən bir hesabat əldə olunur. Kompüterdə avtomatik təhlillər aparılır və xüsusi qrafiklərdə baş verənləri izləmək mümkündür. Bununla svayların vəziyyəti haqqında məlumat əldə olunur.

Qazıntı, daha sonra tikinti aparılarkən, müxtəlif dərinliklərdə qrunt laylarında yerdəyişmələrin diaqramı sahədə deformasiyanın olub-olmadığını üzə çıxarır. Bunun da əsasında yerin vəziyyəti haqqında müfəssəl məlumat əldə etməklə işləri tam təhlükəsiz və etibarlı şəkildə aparmaq olur. Bir sözlə, aparılan ölçmələr sayəsində nəinki ətraf binaların, həmçinin tikintinin təhlükəsizliyi təmin olunur. Bu isə metro tikintisində əhəmiyyətli yeniliklərdir”.

HƏQİQƏT