Gənc bioloqlar və həkimlərin Almaniyaya “Biotexnologiya ilə ilk təmas” adlı tanışlıq səfəri başlayıb

Bir qrup azərbaycanlı gəncin Almaniyanın Mannheim şəhərinə Almaniya Akademik Mübadilə Xidmətinin təşkil etdiyi (DAAD) gənc bioloqlar və həkimlər üçün "Biotexnologiya ilə ilk təmas" adlı tanışlıq səfəri başlayıb.

Gənclər Fondunun dəstəyi ilə oktyabrın 6-dək davam edəcək səfərin məqsədi azərbaycanlı gənclər arasında biotexnologiya elminin təbliği və onların dünyanın inkişaf etmiş ölkələrində ixtisaslaşma imkanları qazanmalarına dəstək verməkdir.

Tanışlıq səfəri müddətində iştirakçılar Mannheim Tətbiqi Elmlər İnstitutu (http://www.hs-mannheim.de/), Nano Elm və Texnologiya İnstitutu (http://www.nsti.org/), Alman Elmi Tədqiqat Xərçəng Mərkəzində (http://www.dkfz.de/) yerləşən müasir laboratoriyalarla tanış olacaq, tanınmış mütəxəssislərin mühazirələrini dinləyəcəklər.

Həmçinin iştirakçılara prof. Verner, prof. Kioschis, prof. Frech, prof. Viedemann, prof. Hafner, prof. Mack tərəfindən biotexnologiyanın müasir problemlərinə həsr olunmuş mühazirələr veriləcək.

Bundan əlavə Bakı Dövlət Universitetinin professorları R.Həsənov və X.Qənbərov ilə gələcək universitetlərarası əməkdaşlıq da müzakirə olunacaq.

Qeyd edək ki, səfər Mannheim Tibb fakültəsi, Mannheim Tətbiqi Elmlər Universiteti, Bakı Dövlət Universiteti, Həkimlər və Təbib Tələbələr Birliyinin əməkdaşlığı ilə hazırlanıb.