“Aztelekom” İB-də bütün iş tamamilə avtomatlaşdırılıb

“Aztelekom” İB-də şöbələrin funksional fəaliyyətləri tamamilə  avtomatlaşdırılıb. Bu barədə “İCTnews” elektron xəbər xidmətinə  birliyin informasiya texnologiyaları şöbəsinin rəisi Ədalət Abbasov məlumat verib. Onun sözlərinə görə, birlik üzrə son zamanlar  Hüquq şöbəsi, Operativ İdarəetmə şöbəsi, Təhlükəsizliyə Nəzarət Qrupu, Baş energetikin fəaliyyətlərinin avtomatlaşdırılması üçün müxtəlif proqram təminatları hazırlanaraq istismara verilib.

Belə ki, “Aztelekom” İB-nin  Kabel Magistrallarının Texniki Qovşağı və Telekommunikasiya qovşaqları üzrə rabitə qurğularının və avadanlıqlarının zədələnməsindən dəymiş zərərin ödənilməsi ilə əlaqədar görülən bütün hüquqi tədbirlər bir mərkəzdə cəmləşib. Şöbə rəisi bildirdi ki, bütün ödəmələr, zədələnmələrlə bağlı hüquqi sənədlərin, onların məlumatlarının “Sistem”də saxlanılması, hər bir zədələnməyə görə görülən bütün tədbirlərə “Aztelekom” İB-nin Hüquq şöbəsində nəzarət edilir. Bütün həyata keçirilən tədbirlərlə bağlı  məlumatların elektron arxivinin yaradılması, sənədlərin elektron variantda hərəkəti və icrası təmin edilib.

Bundan əlavə birlik üzrə magistral kabellərdə baş vermiş zədələnmələr və görülən tədbirlərin Operativ idarəetmə şöbəsində hesabatı və arxivləşdirilməsi də tam avtomatlaşdırılıb.

Ümumi Təhlükəsizliyə Nəzarət Qrupu tərəfindən nəzarət olunan kameralarda görüntülərlə bağlı nasazlıqların və  baş vermiş hadisələrin qeydiyyatının aparılması, sənədlərin elektron variantda hərəkəti və arxivləşdirilməsi sistemi istifadədədir.

Birlik üzrə enerji sərfiyyatına nəzarət, yerlərdə hər bir TKQ üzrə müxtəlif yanacaq növləri üzrə sərfiyyatın qeydiyyatının həyata keçirilməsi, qoyulmuş limitlərə əməl olunmasına nəzarət və s. elektron formada olmaqla rəhbərliyin tam nəzarətindədir.

RƏVAN

---