Azərbaycanda güzəştli şərtlərlə 20 minə yaxın kompüter satılıb

Hazırda “Xalq kompüteri” layihəsinə Azərbaycanın paytaxtı ilə yanaşı, regionlarda da böyük maraq müşahidə edilir.  “ICTnews” elektron xəbər xidmətinin məlumatına görə, artıq layihə çərçivəsində ölkə üzrə satılan kompüterlərin sayı 19 700 ədədə çatıb.

Rabitə və İnformasiya Texnologiyaları Nazirliyi və Təhsil Nazirliyi tərəfindən təşkil olunan layihənin məqsədi əhalinin müxtəlif sosial təbəqələrinin müasir kompüterlər və lisenziyalı proqram təminatı əldə etmələri üçün şəraitin yaradılması, regionlarda informasiya-kommunikasiya texnologiyalarının (İKT) dayanıqlı tətbiqinin genişləndirilməsi vasitəsilə "rəqəmsal bərabərsizliyin" aradan qaldırılması, eləcə də Azərbaycan hökumətinin  informasiya cəmiyyətinin və "Elektron hökumət"in inkişafına yönəldilmiş fəaliyyətinə dəstək olmaqdan ibarətdir.

 Hazırda layihə orta məktəb müəllimləri və şagirdlərinin, ali təhsil müəssisələrinin müəllim və tələbələrinin, dövlət qulluqçularının, həmçinin səhiyyə işçilərinin ailələrinə  faizsiz olaraq 12 ay müddətinə kreditlə və bazar qiymətlərindən 25-40% aşağı qiymətlərlə kompüterə sahib olmaq imkanını təqdim edir.

CAHANGİR

---