Hakerə internetdən istifadə qadağan edilib

“Cosmo the God” ləqəbli amerikalı hakerə 6 il müddətinə internetdən istifadə qadağan edilib. O, internetdən yalnız dövlətin təyin etdiyi xüsusi şəxsin nəzarəti altında istifadə edə biləcək. “Cosmo” ləqəbli haker 21 yaşına çatdıqda məhkəmə gəncin sınaq müddətindəki davranışını nəzərdən keçirərək onun sonrakı taleyi barədə qərar qəbul edəcək.

“ICTnews.az” elektron xəbər xidməti “tech.onliner.by” saytına istinadən bildirir ki, məhkəmədə baxılmış sənədlərə əsasən “Cosmo” “UG Nazi” haker qruplaşmasının tərkibinə daxil olub. Qeyd edək ki, bu haker qruplaşması “NASDAQ” birjası və Mərkəzi Kəşfiyyat İdarəsi (MKİ) saytlarının “sındırılmasında” təqsirli bilinir.

Bundan başqa, hakerə “UG Nazi” və “Anonymous” qruplaşmasının nümayəndələri ilə əlaqə saxlamaq qadağan edilib. Əgər o, tələbləri pozsa, onu 3 il müddətinə qədər həbs cəzası gözləyir.

 
EMİL

---