«Azərbaycanda da internet tam azaddır»

«Dünyanın bir sıra inkişaf etmiş ölkələrində olduğu kimi, Azərbaycanda da internet tam azaddır. Burada heç bir məhdudiyyətdən söz gedə bilməz». “ICTnews” elektron xəbər xidmətinin məlumatına görə, bu fikirləri AMEA-nın İnformasiya Texnologiyaları İnstitutunun direktoru Rasim Əliquliyev söyləyib.

O bildirib ki, hər bir Azərbaycan vətəndaşı, o cümlədən, ölkəmizdə olan xarici qonaqlar çox sərbəst formada internetdən istifadə edə bilir, istədikləri saytlara daxil olur və lazımi informasiyaları əldə edir.

Azərbaycanda nə sosial şəbəkələrdən iştirakda, nə bloqqer fəaliyyətində, nə hansısa xidmətlərin istifadəsində hər hansı bir məhdudiyyət olmadığını vurğulayan direktorun sözlərinə görə, dövlətimiz internetə tam demokratik münasibət göstərir: «Azərbaycan insan azadlığını, cəmiyyət azadlığını, demokratik dəyərləri göz önünə gətirərək, o azadlığa zərrə qədər də məhdudiyyət qoymur.

Müəyyən problemlər ola bilər ki, bu da texniki xarakter daşıyır. Bu, azadlıqla bağlı olmayan məsələlərdir. İnternet belə bir mühitdir ki, burada populyar məlumatlar çoxaldıqca, həmin səhifəyə müraciətlərin də sayı artır və texniki cəhətdən yüklənmə gedərək, problemlər yaranır. Ümumiyyətlə, Azərbaycan dövləti ölkədə internetin geniş inkişafında maraqlıdır».

SEYMUR

---