Beynəlxalq elmi konfransda “Nitq tanınma sistemləri”, “Dil, işarə və onun kompüter şərhi”, “Süni intellekt” kimi mövzuların müzakirəsi başlayıb

Azərbaycan Dillər Universitetində (ADU) bu ali təhsil müəssisəsinin və AMEA Nəsimi adına Dilçilik İnstitutunun birgə təşkilatçılığı ilə “Tətbiqi dilçiliyin müasir problemləri” mövzusunda beynəlxalq elmi konfrans davam edir.

“ICTnews” elektron xəbər xidmətinə bu barədə AMEA-dan məlumat verilib. Akademiyadan bildirilib ki, konfransın plenar iclasında ADU-nun rektoru, professor Səməd Seyidov müasir tətbiqi dilçilik və ümumiyyətlə, dilçilik probleminin bu gün Azərbaycanda ön planda olan əhəmiyyətli mövzulardan biri olduğunu qeyd edib: “Gündən-günə inkişaf edən Azərbaycan dünyaya açılır.

Dünyada layiqincə təmsil olunmaq üçün yüksək səviyyədə həm dil, həm də tətbiqi dilçilik problemləri araşdırılmalıdır”.

Konfransda “Nitq tanınma sistemləri”, “Dil, işarə və onun kompüter şərhi”, “Süni intellekt”, “Xarici dillərin tədrisində qlobal dil amili”, “Qloballaşma və çoxdilliliyin tərcüməyə və tərcüməçiyə təsiri, “Dil və bədii qavrama” və s. mövzularda məruzələr dinlənilib, müzakirələr aparılıb. Həmçinin tədbir “Dil və kompüter”, “Xarici dillərin tədrisi kommunikativ səriştə kontekstində”, “Tərcümə dillərarası və mədəniyyətlərarası kommunikasiya vasitəsi kimi”, “Psixolinqvistika: problemlər və perspektivlər” mövzularından bəhs edən bölmələr üzrə davam edir.

HƏQİQƏT