Milli İnternet Mükafatının nominantları seçilib

Milli İnternet Mükafatı “Milli Net 2012”-də səsvermənin 1-ci mərhələsi başa çatıb. “ICTnews” elektron xəbər xidmətinin Təşkilat Komitəsinə istinadən verdiyi məlumata görə, müsabiqəyə 13 nominasiya üzrə 399 sayt təqdim edilmişdi. Onlardan yalnız 326 sayt müsabiqəyə qəbul edilib və səsvermədə iştirak edib.

Azərbaycan İnternet Forumu (AİF) tərəfindən, Dizayn, Məzmun və Texniki-texnoloji istiqamətlər üzrə formalaşdırılan 15 nəfərlik Müsabiqə Komissiyası üzvlərinin hər birisi 1-ci mərhələdə saytların qiymətləndirilməsində iştirak edib. Səsvermənin 1-ci mərhələsinin yekununda 13 nominasiya üzrə ən yaxşılar olan 82 sayt nominant statusu alıb. Səsvermənin 2-ci mərhələsi 03 dekabr tarixində başlayacaq və 15 dekabrda başa çatacaq.

Müsabiqə Komissiyası 15 dekabr tarixinədək nominantlar arasından hər nominasiya üzrə qalib saytları müəyyən edəcəklər. Milli İnternet Mükafatının yekun təqdimat mərasiminin 19 dekabr tarixində keçirilməsi nəzərdə tutulub. Təşkilat Komitəsi tərəfindən hazırda qaliblərin mükafatlandırılmasına hazırlıq işləri görülür.

Müsabiqədə 13 nominasiyanın hər biri üzrə qalib gələnlərə “Milli Net”in tuncdan hazırlanmış xüsusi mükafatı – hörümçək əks olunan buta, 2-ci və 3-cü yerlərin qaliblərinə diplomlar təqdim olunacaq. Cari ildə ilk dəfə olaraq “Ən yaxşı sosial şəbəkə” və “StartUp 2012” nominasiyaları da əlavə olunub. “Ən yaxşı sosial şəbəkə” nominasiyasının qaliblərinə “SAZZ” şirkətinin xüsusi mükafatları da təqdim olunacaq. Müsabiqənin baş sponsoru “Azercell” şirkətidir.

Rabitə və İnformasiya Texnologiyaları Nazirliyi, “Delta Telecom” və “SAZZ” şirkətləri də Milli İnternet Mükafatına dəstək verirlər.

CAHANGİR

---