Bakıda dövlətə məxsus qeyri-yaşayış sahələrinin cizgiləri elektron məlumat bazasına daxil edilir

Daşınmaz əmlakın vahid dövlət kadastrının tərtib edilməsi və aparılması istiqamətində “Sumqayıt şəhəri üzrə daşınmaz əmlaklar haqqında elektron kadastr məlumat bazasının yaradılması və rəqəmsal kadastr xəritələrinin tərtibi” layihəsi artıq başa çatıb.

“Bakı şəhəri üzrə daşınmaz əmlaklar haqqında elektron kadastr məlumat bazasının yaradılması və rəqəmsal kadastr xəritəsinin tərtibi” işlərinə başlanılıb. 20 dekabr 2012-ci il tarixində Almaniyanın “KfW”, “Frankfurt am Main” ("KfW) ilə Kredit və Maliyyələşdirmə Sazişi (Kadastr və Daşınmaz Əmlakın Qeydiyyatı Layihəsi) bağlanıb və həmin sazişlər üzrə Xüsusi Razılaşma Sənədi imzalanıb.

Bakı şəhərində yerləşən icarəyə verilən və ya özəlləşdirməyə açıq elan edilən dövlətə məxsus qeyri-yaşayış sahələrinin cizgilərinin elektron məlumat bazasına daxil edilməsi istiqamətində işlərə başlanılıb.

“ICTnews” elektron xəbər xidmətinə bu barədə Əmlak Məsələləri Dövlət Komitəsindən (ƏMDK) məlumat
verilib. Komitədən bildirilib ki, ötən müddətdə daşınmaz əmlakın vahid kadastrının aparılması, ünvan reyestri və daşınmaz əmlak obyektlərinə ünvan verilməsi sahələrində müəyyən edilmiş tədbirlər də həyata keçirilib. Belə ki, dövlət mülkiyyətində olan daşınmaz əmlak obyektlərinin elektron kadastr məlumat bazasının yaradılması işlərinin icrası davam etdirilib:

“Azərbaycan ərazisində yeni formalaşdırılan irihəcmli daşınmaz əmlak obyektlərinin inşası üçün nəzərdə tutulmuş ərazilərin kadastr planlarının tərtibi və onlardan çıxarışların verilməsi istiqamətində işlər görülüb. 1 yanvar 2013-cü il vəziyyətinə dövlət mülkiyyətində olan 27119 ədəd torpaq sahəsinin (113527.65 hektar) və bu torpaq sahələrində yerləşən daşınmaz əmlak obyektləri barədə elektron kadastr məlumat bazası yaradılıb və kadastr planları tərtib edilib. Həmin torpaq sahələrindən 16930-u (83925.32 hektar) barədə tərtib olunmuş kadastr planlarından çıxarışlar hazırlanıb”.

HƏQİQƏT