Dünyanın ən ucuz planşetofonu istehsal ediləcək

Çinin “Mogu” telefon istehsalçısı “Android” platformasında işləyəcək dünyanın ən ucuz planşetofonunu istehsal etməyi planlaşdırır. Onun qiyməti 299 yuan (47,97 ABŞ dollar) təşkil edəcək.

“ICTnews.az” elektron xəbər xidməti “news.rambler.ru” saytına istinadən bildirir ki, Çin vətəndaşları bu pulu ödəməklə dizaynına görə “Samsung Galaxy” seriyasından “ağıllı” telefonları xatırladan 5 düymlü “Mogu S1”-ə sahiblənəcək.

Xüsusiyyətlərinə gəlincə, ekranın təsvir ölçüsü “WVGA” formatını (800 x 480 piksel) dəstəkləyir, 1 QHs takt tezlikli birnüvəli prosessorla təchiz edilib, 2 meqapiksel təsvir ölçüsündə kamera, hətta ön “VGA” kamerası, “Bluetooth”, “GPS”, “Wi-Fi” modulları mövcuddur. Akkumulyator batareyasının tutumu 2000 milliamper/saat təşkil edir. Qurğunun ölçüsü 149x79x10 millimetr təşkil edir.

Emil Hüseynov

---