TİMS bazasında 1 milyon 300 mindən çox şagird haqqında məlumat toplanıb

Təhsil Nazirliyinin Təhsilin İdarəolunmasının Məlumat Sistemləri (TİMS) şöbəsi pedaqoji heyət, kadrlar, şagirdlər və təhsil müəssisələri ilə bağlı məlumatların toplanmasını davam etdirir. Artıq 2012-2013-cü tədris ili üçün bütün məlumatlar bazaya toplanıb.

“ICTnews” elektron xəbər xidmətinə bu barədə Təhsil Nazirliyinin Təhsilin İdarəolunmasının Məlumat Sistemləri şöbəsinin (TİMS) müdiri İsmayıl Sadıqov məlumat verib. TİMS-in şöbə müdiri qeyd edib ki, hər hansı yenilik olarsa, bazada məlumatların dəqiqləşdirilməsi davam edir: “Hazırda TİMS bazasında təxminən 1 milyon 300 mindən çox şagird haqqında məlumat var.

Pedaqoji heyətə gəlincə, bu say təxminən 160 minə yaxındır. Başqa ölkələrdə məktəb direktorları tədrislə məşğul olmadıqları üçün onlar pedaqoji heyət hesab olunmur. Ona görə də pedaqoji heyətlə bağlı rəqəmlər yanaşmadan asılı olaraq dəyişir. Eyni zamanda hərbi dərsləri deyənlərin pedaqoji heyətə daxil edilib-edilməməsi də müzakirə olunan məsələlərdən biridir.

Qeyd edək ki, bazaya məlumatların daxil olunması məhz məktəblərin (Təhsil şöbələrinin) özləri tərəfindən aparılır və həmin məlumatlar dərs ili ərzində daim yenilənir. Təhsilin idarəolunmasının məlumat sisteminin (education management information system, EMIS) yaradılmasında başlıca məqsəd informasiya texnologiyaları əsasında təhsilin səmərəli idarəolunması sistemini formalaşdırmaq, təhsilin inkişafı üçün dövlət proqramlarının hazırlanması, reallaşdırılması və monitorinqi proseslərini idarə etmək, təhsil sisteminin qısamüddətli və uzunmüddətli perspektiv üçün inkişafını proqnozlaşdırmaqdır.

HƏQİQƏT

---