Azərbaycanın səhiyyə işçiləri üçün informasiya texnologiyaları üzrə təlimlər təşkil edilib

Səhiyyə Nazirliyi yanında "Səhiyyə Sektorunda İslahatlar Layihəsi" (SSİL) və Dünya Bankının dəstəyi ilə "Mədəd Azərbaycan" təşkilatı Abşeron, Ağdaş, İsmayıllı, Qax və Şəki şəhərlərində 617 səhiyyə işçisi üçün "Səhiyyə İşçiləri üçün İnformasiya Texnologiyalarının əsasları" adlı təlimlər həyata keçirir. Məqsəd həkim, tibb bacısı və səhiyyə işçilərini kompüterin əsasları, ofis proqramları, şəbəkə, rəqəmsal həyat tərzi və şəxsi məlumatların təhlükəsizliyi üzrə təlimatlandırmaqdır.

Bu barədə İKT İnformasiya Mərkəzindən məlumat verilib. Mərkəzdən bildirilib ki, təlimlər "Səhiyyə Sektorunda İslahatlar Layihəsi"ni maliyyələşdirmək məqsədilə Dünya Bankı tərəfindən Azərbaycan Respublikası üçün ayrılmış kredit hesabına maliyyələşir.

SSİL-in məqsədi səhiyyə sahəsində maliyyənin idarəedilməsi sistemini təkmilləşdirmədə İT təminatının zəruriliyini vurğulamaqla sağlamlıq göstəricilərini yaxşılaşdırmaq və davamlılığını təmin edərək, seçilmiş rayonlarda zəruri səhiyyə xidmətlərinə çıxış imkanlarını və bu xidmətlərin keyfiyyətini artırmaqdan ibarətdir.

"Mədəd Azərbaycan" təşkilatı Abşeron, Ağdaş, İsmayıllı, Qax və Şəki şəhərlərindəki təlim mərkəzlərində təlimləri təşkil edir. Təlim iştirakçıları yüksək keyfiyyətli təlim materialları, lazımi avadanlıq və mərkəzlərdə internetdən səmərəli və rahat istifadə edilməsi üçün hər cür şəraitlə təmin edilmişdilər.

Altı sessiyadan ibarət olan 48 saatlıq təlimlər iştirakçılara interaktiv üsul və iş formalarından istifadə etməklə iş yerlərində müasir texnologiyaların tətbiqi sayəsində səmərəliliyi aşılayır. Qeyd edək ki, sözügedən təlimlər mart ayının sonuna qədər davam edəcək.

HƏQİQƏT

---