BDU-da inşası nəzərdə tutulan tələbə şəhərciyi ən müasir texnologiyalarla təchiz ediləcək

BDU-nun 100 illik yubileyinə hazırlıq məqsədilə həyata keçiriləcək tədbirlər planı çərçivəsində universitetin tələbə şəhərciyi ən müasir texnologiyalarla təchiz ediləcək.

Şəhərcik innovativ üsulla tamamilə yenidən qurulacaq. BDU-nun iqtisadi və təsərrüfat işləri üzrə prorektoru Nəbi Ramazanlının verdiyi məlumata görə, bu məqsədlə Azərbaycan prezidentinə müraciət olunub.

"BDU-da tələbə yataqxanasının olması vacibdir. Universitetin reytinqini müəyyən edəndə yataqxanaya xüsusi önəm verilir . Bu baxımdan, həm də tələbələrin rahatlığı üçün bu məsələnin həlli vacibdir. Hazırda yataqxanalar yararsız vəziyyətdədir. İlk öncə 5 yataqxananın sökülməsinə başlanacaq. Daha sonra mərhələlərlə digər yataqxanalar söküləcək. Dövlət büdcəsindən şəhərciyin tikintisi üçün vəsait ayrılan kimi tikintiyə başlanacaq. Burada bütün infrastruktur, o cümlədən ən müasir informasiya və kommunikasiya texnologiyaları ilə təchizat məsələləri yüksək səviyyədə olacaq. Burada söhbət müasir universal multimedia taksofonlarından tutmuş, genişzolaqlı internet xidmətlərindək bütün təchizatdan gedir" .

N.Ramazanlı bildirib ki, ərazidə 5 yataqxana binası tikiləcək: "Binaların hündürlüyü həmin ərazinin relyefindən asılı olaraq dəyişəcək. Belə ki, yerin relyefi yüksəldikcə mərtəbələrin sayı azalacaq. Məsələn, Mətbuat prospekti tərəfdən olan ərazidə 16-17 mərtəbəli, daha yuxarı qalxdıqca yerin hündürlüyündən asılı olaraq 14, 13, 12 və s. mərtəbədə binalar inşa olunacaq. Ən son hündürlükdə tikiləcək bina 6 mərtəbəli olacaq.

Qeyd edim ki, binalar Avropa və dünyanın ən qabaqcıl universitetlərinin tələbə səhərcikləri (kampusları) səviyyəsində olacaq. Orada müasir standartlara cavab verən bütün şərait yaradılacaq".

RƏVAN