“Azərpoçt” MMC-nin göstərdiyi bank xidmətlərinin əhatə dairəsi genişlənir

"Azərpoçt" MMC-də 2013-cü ilin I rübü ərzində maliyyə xidməti fəaliyyətinin həyata keçirilməsi üçün icazələrin alınması işi davam etdirilib və Mərkəzi Bankdan daha 8 poçt şöbəsinə maliyyə xidmətləri göstərilməsi üçün icazə alınıb. Hazırda respublika ərazisində MMC üzrə 70 ədəd POS-terminal və 14 ədəd ATM-lər müştərilərə xidmət göstərir.

Qeyd edək ki, "2008-2015-ci illərdə Azərbaycan Respublikasında yoxsulluğun azaldılması və davamlı inkişaf Dövlət Proqramı"nda "Poçt əmanət sisteminin inkişaf etdirilməsi" istiqaməti də yer alıb. Bəndə müvafiq olaraq, "Azərpoçt" MMC-nin poçt filiallarının (PF) şəbəkələşdirilməsi və avtomatlaşdırılması başa çatdırılıb və onların MMC-nin Avtomatlaşdırılmış Korporativ İnformasiya Sisteminə qoşulması təmin edilməklə poçt maliyyə xidmətlərinin göstərilməsinə başlanılıb.

"Azərpoçt" MMC-nin Mərkəzi Bankın AZİPS və XÖHKS sistemlərinə, eləcə də "SWIFT" sisteminə inteqrasiyası da başa çatdırılıb və xarici banklarda - "Citybank", "Raifaizenbank" və Rusiyanın "Sberbank"-da müxbir hesablar açılıb. "Azərpoçt" MMC "MasterCard" beynəlxalq ödəniş sistemi tərəfindən verilmiş lisenziyaya əsasən, 10.02.2012-ci il tarixdən etibarən "MasterCard" brendli beynəlxalq plastik kartların emissiyasını və ekvayrenqini həyata keçirir.

Hazırda 5500-dək beynəlxalq statuslu plastik kartlar emissiya edilib. "MasterCard" brendli kartlar müştərilərə verilib və bu sahədə işlər davam edir.

HƏQİQƏT

---