Avropa Şurası internet istifadəçilərinin hüquqları haqda bəyannamə hazırlamaq niyyətindədir

Avropa Şurası 2014-cü ilədək internet istifadəçilərinin hüquqlarını müəyyənləşdirəcək sənəd hazırlamağı planlaşdırır. Bu barədə bu gün Rusiyada internetin tənzimlənməsi ilə bağlı keçirilən Forumda Avropa Şurasının İnsan Hüquqları və Hüquq Məsələləri üzrə baş direktoru Filip Buayya deyib. O vurğulayıb ki, Avropa Şurası internetin azadlığına və onlayn xidmətlərin mühafizəsinə böyük önəm verir.

"Özünüifadəetmə azadlığı informasiya cəmiyyətinin özülünü təşkil edir", - o vurğulayıb və eyni zamanda etiraf edib ki, təhlükəsizliyin təmin olunmadığı yerdə azadlıq yoxdur". Onun sözlərinə görə, internet təhlükə və kibertəhdidlərdən, ilk növbədə uşaqları qorumaq lazımdır.

"ICTnews.az" elektron xəbər xidməti "tasstelecom.ru" saytına istinadən bildirir ki, Avropa Komissiyasının vitse-prezidenti Nili Kroesin sözlərinə görə, Rusiya qlobal rəqəmli iqtisadiyyatda əsas "oyunçu"dur. "İnternet – dünya iqtisadiyyatının strateji istiqamətidir. Açıqlıq, azadlıq və şəffaflıq modelinə riayət etmək lazımdır", - deyə o, forum iştirakçılarına öz videomüraciətində bildirib. O, bütün dövlətlərin nümayəndələrini "internet demokratiyası"nı inkişaf etdirməyə, qlobal internet məkanının tənzimləmə metodlarını birgə hazırlamağa səsləyib.

Emil Hüseynov

---