1 petaflops məhsuldarlığa malik ilk superkompüter işə salınıb

ABŞ-ın İndiana Universiteti “Cray” şirkəti tərəfindən yaradılmış “Big Red II” adlanan superkompüterin istifadəyə verilməsini elan edib. “ICTnews.az” elektron xəbər xidməti “compulenta.ru” saytına istinadən bildirir ki, sözügedən hesablama sisteminin pik məhsuldarlığı 1 petaflops (saniyədə üzən vergüllə kvadrillion əməliyyat) təşkil edir.

Müqayisə üçün qeyd edək ki, hazırda ”Top-500” superkompüterlər reytinqində birinci yerdə qərarlaşmış “Titan” kompleksinin sürəti 17,6 petaflopsdur. “Big Red II” superkompüterində hibrid konfiqurasiyadan istifadə edilib: “AMD”-nin çoxnüvəli prosessorları və “nVidia Tesla K20” sürətləndiricisi tətbiq edilib.

Hesablama nüvələrinin ümumi sayı 21824-dür, əməli yaddaşın ümumi həcmi isə 43648 QB təşkil edir. Verilənlərin saxlanılması sisteminin həcmi 180 TB-dır. “Big Red II” superkompüterinin dünyada 1 petaflops məhsuldarlığa malik ilk universitet superkompüteri olduğu iddia edilir.

Onu tibb, fizika, iqlim dəyişiklikləri və s. ilə bağlı tədqiqatlarda istifadə etmək planlaşdırılır.

Emil Hüseynov

---