“Azerspace-1” telekommunikasiya peykinin tutumlarının 40 faizinin satışına başlanılıb

Mayın 1-dən etibarən "Azərkosmos" ASC-nin kommersiya fəaliyyətinə, o cümlədən"Azerspace-1" telekommunikasiya peykinin tutumlarının 40 faizinin satışına başlanılıb.

Bu barədə rabitə və informasiya texnologiyaları naziri Əli Abbasov jurnalistlərə açıqlamasında bildirib. Nazirin sözlərinə görə, ilk milli peykimizdən əsasən Şimali Afrika üzərində olan operatorlar istifadə etməyə başlayıb:

"Bizim əsas məqsədimiz yerli resursların, o cümlədən radio-televiziya sisteminin süni peykdə yerləşdirilməsidir. Bununla bağlı artıq texnoloji proseslər başa çatıb. Lakin burada müəyyən müqavilələr tələb olunur".

Həmçinin qarşıda duran məsələlərdən biri də yeni fəaliyyətə başlayan zaman süni peykin fərdlər tərəfindən istifadə olunan antenalara köklənməsi və onun uyğun səmtə yönəldilməsidir ki, bu istiqamətdə də işlər davam etdirilir".

Qeyd edək ki, "Azerspace-1" peykinin təkmil texnoloji dizaynı və geniş qoşulma imkanları vasitəsilə dünyanın təqribən 1/3 hissəsini əhatə edəcək coğrafiya üzrə milyonlarca insan müasir informasiya və rabitə xidmətlərindən rahat istifadə edə biləcək. İlk telekommunikasiya peykimiz 50-dən artıq ölkəni birləşdirən məkanda, Qafqaz ölkələri, Avropa, Afrika, Mərkəzi Asiya və Yaxın Şərq regionunda mühüm iqtisadi rol oynayacaq.

HƏQİQƏT

---