Estoniya ilk peykini orbitə buraxıb

Bu il mayın 6-da yerli vaxtla saat 23:06-da Fransanın Qviana Kosmik Mərkəzinin Kuru kosmodromundan “Vega” Avropa raket daşıyıcısı işə salınıb.

Avropa Kosmik Agentliyinin (AKA) press-relizinə əsasən, raket Estoniyanın “ESTCube-1” adlanan ilk, Avropanın “Proba-V” və Vyetnamın “VNREDSat-1A” peyklərini müvəffəqiyyətlə orbitə çıxarıb.

“ICTnews.az” elektron xəbər xidməti “lenta.ru” saytına istinadən bildirir ki, Estoniyanın ilk peykinin çəkisi 1 kiloqramdır və “İnterfaks” agentliyinin informasiyasına əsasən, o, Latviya, Litva, Almaniya və ukraynalı tələbələr, həmçinin eston, fin və almaniyalı alimlərlə əməkdaşlıq çərçivəsində eston tələbələri tərəfindən yaradılıb.

Peyk fin alimi Pekka Yanxunen tərəfindən yaradılmış elektrik yelkənlə təchiz edilib. Gələcəkdə bu cür qurğular vasitəsilə peyki orbitdən geri qaytarmaq planlaşdırılır.

Emil Hüseynov

---