Metro vaqonlarında maşinist idarəetmə sistemi tamamilə elektronlaşdırılıb

Ötən ilin sonlarında əsaslı təmir və modernləşdirmə məqsədilə Tbilisi elektrik qatarlarının təmiri zavoduna göndərilmiş bir qatar tərkibini formalaşdıran 5 vaqon artıq "Nərimanov" elektrik deposuna gətirilib. Hazırda vaqonlarda son sazlama işləri aparılır və qatar depo yollarında sınaqdan çıxarılır.

"ICTnews" elektron xəbər xidmətinə bu barədə məlumat verən Bakı Metropolitenindən (BM) bildirilib ki, yeni texnologiyaların tətbiqi səbəbi ilə bir çox ehtiyat hissələrini tapmaq və ya onlara qulluq etmək xeyli çətinləşdiyi üçün vaqonların modernləşdirilməsi zamanın tələbinə çevrilib:

"Yenilənmə zamanı əsas diqqət işçi hissələrə, o cümlədən akkumulyator batareyaları və qidalanma blokuna yönəldilmişdi. Bu sistemin əsas vəzifəsi sərnişin salonunu işıqlandırmaq və akkumulyator batareyalarını doldurmaqdır. Yeniliyin üstünlüklərinə gəlincə, ilk növbədə onların yeni nəsil istehsalı olması vurğulanmalıdır. Sərnişinlərin hiss edəcəyi dəyişikliklər sırasında vaqonun yeniləşmiş xarici və daxili rəng boyasını, maşinist kabinəsindəki elektron istiqamət göstəricisini qeyd etmək olar. Maşinist güzgü şüşələrini idarəetmə pultundan avtomatik tənzimləyə və idarə edə bilir. Kabinənin özündə də əsaslı yeniləşmə var. Yumşaq kreslo diqqəti çəksə də, ən vacib yeniliklər idarəetmə ilə bağlıdır. Maşinist idarəetmə sistemi artıq tamamilə elektronlaşdırılıb. Sxem və sistemlərin, rele və blokların əvəzinə daha yığcam və elektron sxemlər tətbiq olunub. Sürətin avtomatik tənzimlənməsində və lokomotiv idarəetməsində təmassız (BARS) sistemlər tətbiq olunub. Vaqonaltı avadanlıqlar da əsaslı surətdə yenilənib. Bu sıradan elektrik, mexaniki və pnevmatik hissələr, arabacıq tam defektoskopiya müayinəsindən keçirilib. Vaqonların naqil sistemi tam dəyişdirilib".

Həqiqət İSABALAYEVA

---