Telekommunikasiya sahəsində “Argela” şirkəti ilə birgə müxtəlif layihələrin həyata keçirilməsi üzrə işlər aparılır

Ölkəmizdə 2013-cü ilin “İnformasiya-kommunikasiya texnologiyaları ili” elan edilməsi bu sahədə silsilə tədbirlərin reallaşmasını gündəmə gətirib. Hazırda “İKT ili” üzrə Rabitə və İnformasiya Texnologiyaları Nazirliyi tərəfindən hazırlanan Tədbirlər Planının icrası davam edir.

Sözügedən sənəddə yer almış tədbirlərin icrasında məsul qurum və icraçılarla yanaşı, müxtəlif qurumların iştirakı da təmin edilir. Bu sahədə həyata keçirilən layihələrdə əməkdaşlıq edilən şirkətlərdən biri də Türkiyənin “Argela” Telekommunikasiya şirkətidir.

Qeyd edək ki, bu yaxınlarda istismara verilmiş “Mobil Cihaz Qeydiyyat Sistemi”, eyni zamanda istismara verilməsi planlaşdırılan “Mobil nömrə daşınması xidməti” layihələrinin reallaşdırılmasında “Argela” şirkətinin mütəxəssislərinin rolu böyük olub. Belə ki, avadanlıqların həm operator hissəsində, həm də Mərkəzi baza sistemində quraşdırılması, onların biri-birləri ilə əlaqələndirilməsi “Argela” şirkəti ilə birgə təşkil edilib. Bundan başqa, layihə üzrə test-sınaq işlərinin həyata keçirilməsi, eyni zamanda onun müvəffəqiyyətlə nəticələnməsi və s. kimi işlərdə də şirkətin xidmətləri danılmazdır. Hazırda respublikamızın telekommunikasiya sahəsində “Argela” şirkəti ilə birgə müxtəlif layihələrin həyata keçirilməsi istiqamətində işlər aparılır.

Şirkətin fəaliyyətinin əhatə dairəsinə gəlincə, əsası 2004-cü ildə qoyulan və baş ofisi İstanbulda yerləşən şirkətin bu gün Ankara ilə yanaşı, Amerika Birləşmiş Ştatları, Ərəb Əmirliklərində də ofisləri mövcuddur.

Ötən müddətdə daha da məşhurlaşan “Argela” hazırda dünyanın 20-dən çox ölkəsində tanınmış telekommunikasiya şirkətləri ilə (Türk telecom, Avea, TTNET, Claro, Geocell, Turkcell, Kuzey Kıbrıs Turkcell, Ucell, Life, Bakcell, Kcell, Moldcell, Airtel) iş birliyindədir. Bir sözlə, “Argela” dəqiq və qabaqcıl, mükəmməl həlli yolları vasitəsilə gəlirlərini və istehlakçı məmnunluğunu artırmağa, xərclərin qarşısını almağa və kadr axınını azaltmağa yardım etmək məqsədilə dünyanın telekommunikasiya operatorları ilə yaxından əməkdaşlıq edir. “Argela” şirkətinin əsas məhsul və həllərinə isə İnternet TV, ünvanlı reklam, göstəricilərin monitorinqi, tənzimləyici həllər – mobil nömrələrin daşınması, mobil cihazların qeydiyyatı daxildir. Bundan başqa, şirkət istehlak proqramları, İN həlləri, şəbəkə konvergensiyası, İMS proyektlər üzrə də kifayət qədər ixtisaslaşıb.

“Argela”nın ən son yeniliyi olan “Argela İnteraktiv Avatar” müştərilərə yeni kommunikasiya vasitələrilə tanış olmağa və özlərini yenidən kəşf etməyə imkan yaradan ən yeni həll yoludur. “Argela” həmçinin müxtəlif layihələr üzrə “Qlobal İndustriya”nın “Best IP TV”, “Hybrid or Connected TV Service Growth Achievement Award” mükafatına layiq görülüb. Bundan başqa, “Argela” femtosell və daha kiçik sellərin həlli yollarının qabaqcıl provayderidir. Şirkət femtosell texnologiyasına görə “Gartner” tərəfindən “Cool Vendor” (“Təmkinli Satıcı”) adlandırılıb.

Small Cell Forumunun da üzvü olan “Argela” kiçik sel bazarı ilə bağlı vacib məsələləri və problemləri həll etmək və bütün dünyada kiçik selin uğur qazanması və istifadə edilməsi üçün vacib olan industriya standartlarını işləyib hazırlamaq məqsədilə digər ekosistem iştirakçıları, şəbəkə operatorları, habelə digər həlli yolları provayderləri ilə fəaliyyətini davam etdirir.

Həqiqət İSABALAYEVA