Mərkəzi Bankın rəsmi internet səhifəsi yeni ünvana köçürülüb

Mərkəzi Bankın əsas kommunikasiya vasitələrindən biri olan rəsmi internet səhifəsinin istifadə imkanları genişləndirilib. MB-dən “ICTnews” elektron xəbər xidmətinə bildirilib ki, müasir tələblərə cavab verən, rahat istifadə imkanlarına malik, müasir mobil platformalara, əməliyyat sistemlərinə adaptasiya olunan, innovativ modulların tətbiq olunduğu yeni internet səhifə hazırlanıb.

Mərkəzi Bankın rəsmi internet ünvanı (www.cbar.az) yeni səhifəyə yönəldilib. “Yenilənən səhifə eyni zamanda Azərbaycan Respublikası Nazirlər Kabinetinin “Dövlət orqanlarının internet informasiya ehtiyatlarının yaradılmasına və idarə edilməsinə dair tələblərin təsdiq edilməsi haqqında” Qərarından irəli gələn tələblərin reallaşdırılmasını da təmin edib. Mərkəzi Bankın yenilənən səhifəsinin hazırlanması prosesində ən qabaqcıl mərkəzi bankların mütərəqqi təcrübəsindən yararlanaraq internet səhifədə axtarış funksionallığı genişləndirilib, xüsusi naviqasiya imkanları yaradılıb, səhifənin dinamik əsasda daim zənginləşdirilməsi imkanları daha da artırılıb, əlavə məlumatların yerləşdirilməsi təmin edilib”.

MB-dan bildirilib ki, sayt “iPhone”, “Android”, “BlackBerry” kimi yeni kommunikasiya cihazları üçün uyğunlaşdırılan versiyaları mobil platformalarda onun ziyarətçilərinə daha əlverişli istifadə imkanları verir. Mərkəzi Bankın internet səhifəsində əlamətdar hadisələri əks etdirən xüsusi səhifələrin açılması praktikası davam etdirilib və bu istiqamətdə ümummilli lider Heydər Əliyevin 90 illik yubileyi münasibəti ilə xüsusi səhifə də öz əksini tapıb.

Səhifədə yubiley münasibəti ilə Mərkəzi Bank tərəfindən həyata keçirilmiş silsilə tədbirlər haqqında geniş məlumatlar yerləşdirilib. Təhlükəsizliklə bağlı tələblərə də tam cavab verən yeni səhifənin məzmun etibarilə zənginləşdirilməsi və texnoloji baxımdan təkmilləşdirilməsi işləri daim diqqətdə saxlanılacaqdır.

SEYMUR

---