“Intel” korporasiyası “Thunderbolt 2” interfeysini təqdim edib

"Intel" korporasiyası "Computex 2013" sərgisində tezliklə "Thunderbolt 2" interfeysini dəstəkləyən qurğuların bazara çıxarılacağını bəyan edib. Sözügedən interfeys verilənlərin hər iki istiqamətdə 20 Qbit/s sürətlə ötürülməsini təmin edəcək.

"ICTnews.az" elektron xəbər xidməti "tech.onliner.by" saytına istinadən bildirir ki, interfeys texnologiyanın birinci versiyası ilə tam uyğundur: yeni kompüterlərə köhnə periferiyanı qoşmaq və ya əksinə mümkün olacaq. "Thunderbolt 2.0" texnologiyasını dəstəkləyən ilk qurğular artıq bu ilin sonunda istehsal ediləcək. Kütləvi istehsal 2014-cü ilə planlaşdırılıb.

Qeyd edək ki, "Thunderbolt 2" interfeysi sürətinə görə "USB 3.0" texnologiyasını ötür və "PCI Express" və "DisplayPort" protokollarını dəstəkləyir.

"Thunderbolt" interfeysinin ilk versiyası 2011-ci ildə "Apple" şirkəti ilə birgə hazırlanıb və "Apple MacBook Pro" noutbukunda və "Apple Cinema" monitorunda təqdim edilib. Hazırda 200 şirkət "Thunderbolt" interfeysini dəstəkləyən qurğu istehsalı üçün lisenziyaya malikdir.

Emil Hüseynov

---