RİTN «Vikipediya» ilə bağlı təkliflər hazırlayır

«Vikipediya»da (Wikipedia) Azərbaycan ilə bağlı məlumatların artırılması ilə əlaqədar olaraq Rabitə və İnformasiya Texnologiyaları Nazirliyində (RİTN) təkliflər paketi hazırlanır.

Bu barədə "ICTnews.az" elektron xəbər xidmətinə RİTN-in Beynəlxalq əlaqələr və qeyri-dövlət qurumları ilə iş şöbəsindən məlumat verilib. Şöbədən bildirilib ki, sözügedən təkliflər Azərbaycanda 2013-cü ilin «İnformasiya-kommunikasiya texnologiyaları ili» elan edilməsi ilə bağlı RİTN üzrə təsdiq edilmiş tədbirlər planına uyğun olaraq hazırlanır.

Bu istiqamətdə aparılan işlərin yaxın zamanlarda başa çatacağı bildirilir. Şöbədə o da qeyd edilib ki, RİTN-in əməkdaşlıq etdiyi QHT-dən biri - Azərbaycan Gənc Tərcüməçilər Assosiasiyası "www.wikipedia.org" saytında Azərbaycan haqqında olan məlumatların genişləndirilməsini təklif edib. Məlumat üçün bildirək ki, AGTA qeyd olunan məqsədə çatmaq üçün "www.wikipedia.org" saytında iki fərqli layihə reallaşdırmaq istəyir.

Onlardan biri "Azneti zənginləşdirək", ikincisi, "Vikipediya Təhsil Azərbaycan" layihələridir. "Azneti zənginləşdirək" layihəsi "www.wikipedia.org" saytında yerləşdirilən və xarici dillərdə olan mühüm layihələrin Azərbaycan dilinə tərcümə edilməsini nəzərdə tutur.

"Vikipediya Təhsil Azərbaycan" layihəsi daha çox tələbələrin şəbəkəsi vasitəsilə "www.wikipedia.org" saytının Azərbaycana aid hissəsini zənginləşdirməsini nəzərdə tutur.

«Layihədə milli kontentin yaradılması və davamlı məqalələrin istehsalı üçün "viki-təlim", "viki-təcrübə", "viki-təhsil", "viki-hərəkat" və sair təkliflər yer alıb».

SEYMUR

---