Bu ilin iyununda noutbukların tədarük həcmi artıb

Tayvanın “Digitimes Research” analitik şirkətinin ekspertləri aparıcı brend və müqavilə istehsalçılarında noutbukların tədarük həcminin artmasını qeydə alıblar: onların iyun üzrə tədarük həcminin göstəriciləri may ayının göstəricisini müvafiq olaraq 19% və 16% üstələyib.

“ICTnews.az” elektron xəbər xidməti “dailycomm.ru” saytına istinadən bildirir ki, brend istehsalçıları arasında nəzərəçarpacaq artım “Hewlett-Packard”, “Asustek Computer” və “Acer” şirkətlərində qeydə alınıb: ötən ay “HP”-də noutbukların tədarük həcmi 2,9 milyon olub; “ASUS” şirkətinin göstəriciləri 1,3-dən 1,6 milyonadək və “Acer”də isə 1,5-dən 1,73 milyonadək artıb.

“Digitimes Research”in məlumatlarına əsasən, “Lenovo” və “Dell” şirkətlərində noutbuk tədarüklərinin həcmi müvafiq olaraq 2.25-dən 2,64 milyonadək və 1,75-dən 1,8 milyonadək artıb.

Lakin ötən ayla müqayisədə müsbət dinamikaya baxmayaraq, cari ilin iyununda tədarük həcmi 2012-ci ilin müvafiq ayı ilə müqayisədə aşağı olub.

Emil Hüseynov

---