Qrafika bazarında sabitlik hökm sürür

 
Qrafik texnologiyalar bazarında vəziyyəti daim araşdıran “Jon Peddie Research” şirkəti növbəti tədqiqatını dərc edib.

Bu dəfə tədqiqat qrafika sahəsində proqram təminatı və avadanlıqla bağlıdır. Ekspertlərin qiymətləndirməsinə görə, bu bazar yaxın illərdə sabit artım göstərəcək, çünki qrafik texnologiyalara tələbat artır. Nəticədə rəssam-qrafik, dizayner və ya proqramçı kimi ixtisaslar daha tələbatlı olacaq.

“ICTnews.az” elektron xəbər xidməti “dailycomm.ru” saytına istinadən bildirir ki,  mütəxəssislərin proqnozuna əsasən, 2016-cı ilədək kompüter qrafikası üçün alətlər hazırlayan şirkətlərin gəliri 142 milyard dollar olacaq. Hazırda bu göstərici 107 milyard dollar təşkil edir.

2013-cü ildə kompüter qrafikası üçün proqram təminatının satış həcmi 17 milyard dollaradək artacaq ki, bu da ötən illə müqayisədə 3 milyard dollar daha çoxdur. Bu bazar böhrandan sonra bərpa olunur. CAD/CAM həlləri seqmentində gəlirin həcmi 7,92 milyard dollar təşkil edəcək.

2013-cü ilin yekununa görə, qrafika bazarında aparat biznesi ən gəlirli sahələrdən biri olaraq qalır və o, 107 milyard dollar həcmində qiymətləndirilir. 2010-cu ildə bu göstərici təxminən 93 milyard dollar olub.
2013-cü ildə mobil qurğulardan 67,86 milyard dollar, kompüter qrafikası  üçün monitorlardan isə 0,7 milyard dollar əldə ediləcək.

Emil Hüseynov
 

---