“Bloomberg” TV-də Azərbaycanın inkişafına, o cümlədən informasiya-kommunikasiya texnologiyalarına dair videoçarxlar nümayiş olunur

Dünyanın nüfuzlu xəbər yayımı qurumlarından olan "Bloomberg LP" şirkətinin televiziya kanalında Azərbaycan iqtisadiyyatının sürətli inkişafını, qazanılmış böyük nailiyyətləri əks etdirən videoçarxlar nümayiş olunur.
 
Videoçarxlardan biri Azərbaycan iqtisadiyyatının ümumi inkişafına, digər 8-i isə informasiya-kommunikasiya texnologiyaları, sənaye, enerji, kənd təsərrüfatı, turizm, alternativ enerji, nəqliyyat və idman sahəsindəki uğurlarımıza həsr edilib. Bu barədə məlumat verən İqtisadi İnkişaf Nazirliyindən bildirilib ki, videoçarxlar "Bloomberg TV Avropa" və "Bloomberg TV Amerika" telekanallarında gün ərzində ən baxımlı saatlarda ("prime time") yayımlanır.
 
Sentyabrın 23-dən etibarən telekanallarda göstərilən videoçarxların yayımı dekabrın 16-dək davam etdiriləcək. Videoçarxları oktyabr ayından etibarən "www.bloomberg.com" internet səhifəsində də izləmək mümkün olacaq.
 
 
Qeyd edək ki, "Bloomberq" televiziyası dünyada 245 milyon abonentə yayımlanır.
 
 
Həqiqət İSABALAYEVA

---