İnternet nəhəngi Misiri tərk edir
ABŞ-ın nəhəng “Yahoo!” internet şirkəti Misirdəki bölməsinin bağlanmasını və sayı açıqlanmayan bütün yerli əməkdaşların işdən azad olunmasını bəyan edib.
Ofisi paytaxt Qahirədə yerləşən Misir bölməsinin bağlanması şirkətin iş səmərəliliyinin artırılması üzrə qlobal proqramın tərkib hissəsi elan edilib. Proqrama kiçik şöbələrin sayının azaldılması və daha böyük regional nümayəndəliklərin yaradılması daxildir. “Yahoo!”-nun Misir bölməsi fəaliyyətini tam olaraq 2013-cü ilin sonunda dayandıracaq və bundan sonra şirkəti regionda Səudiyyə Ərəbistanı və İordaniyada yerləşən şöbələr təmsil edəcək.
Qeyd edək ki, populyar axtarış sisteminə malik olan və mənzil-qərargahı Kaliforniya ştatının Sanniveyl şəhərində yerləşən “Yahoo! Inc.” şirkəti 1994-cü ildə təsis olunmaqla geniş spektr internet xidmətləri təqdim edir. Şirkətin xidmətlərindən ümumilikdə 0,5 milyard istifadəçi yararlanır, - “RBK
www.rbc.ru” yazır.