“Apple” şirkəti iki patentin pozulmasında günahlandırılır

“Apple” şirkətinə qarşı “DSS Technology Management” patent şirkəti tərəfindən iddia qaldırılıb.
“ICTnews” xəbər xidmətinin “www.cybersecurity.ru” saytına istinadən verdiyi məlumata əsasən, şirkət bildirib ki, “Apple” onun simsiz fərdi qurğuların istifadəsi ilə bağlı iki patentinin hüquqlarını pozub.

“DSS” şirkətində bildiriblər ki, “Apple” şirkəti “Mac Mini”, “iPad”, “iPhone”, “iPod Touch”, “iPod Nano” və hələ buraxılmayan “Mac Pro” modelinin istehsalında qanunsuz patentlər istifadə edib. Əsas qanun pozuntusu bir kanal vasitəsilə bir qurğudan   digər  qurğulara məlumatların ötürülməsində “Bluetooth” texnologiyasının istifadəsidir.

“DSS”-dən bildiriblər ki, oktyabrda qeyd edilən patentləri öncəki sahibindən alaraq istifadə hüququ əldə ediblər. İkinci patent az güclü “Bluetooth” qurğularının istehsalı ilə bağlıdır.
Rəsmi olaraq DSS bildirib ki, şirkət elmi araşdırma, patentləşdirmə və lisenziyalaşma ilə bağlı fəaliyyət həyata keçirir, lakin təcrübədə DSS kimi hüquq subyektləri “patent trolları” adlanırlar.

Aynur Vəliyeva
 

---