5 il sonra “LTE” şəbəkəsindən 2 milyard insan istifadə edəcək

2013-cü ilin yekununa görə, dördüncü nəsil "Long Term Evolution" (LTE) mobil rabitəsindən istifadə edən abunəçilərin sayı 238 milyon təşkil edəcək. "Strategy Analytics" tədqiqat agentliyi əməkdaşlarının  proqnozuna əsasən, 2018-ci ildə bu göstərici 2 milyardı ötəcək.

Onların qiymətləndirmələrinə görə, 5 il sonra mobil rabitə xidmətlərindən əldə olunan gəlirin təxminən 50%-i LTE texnologiyasının payına düşəcək. Proqnozlaşdırılan dövrdə ABŞ, Yaponiya və Cənubi Koreya gəlirin 76%-nə nəzarət edəcək, halbuki cari ilin əvvəlində LTE bazarında bu ölkələrin hökmranlığı 90% olub. "Strategy Analytics" şirkətinin əməkdaşı Fil Kendal hesab edir ki, adı çəkilən üç dövlət liderliyi qoruyub saxlayacaq, lakin LTE sahədə bütün diqqət Çinə yönələcək.

"ICTnews" elektron xəbər xidməti "dailycomm.ru" saytına istinadən bildirir ki, hazırda "China Mobile" mobil rabitə operatoru Çində "TD-LTE" şəbəkəsinin irihəcmli sınaqlarına başlayıb. 2013-cü ilin sonuna kimi şirkət ölkənin 100 şəhərində təxminən 200 min baza stansiyası işə salmağı planlaşdırır.
"Bununla əlaqədar yaxın iki ildə Çin qlobal ucuz "4G" qurğular bazarının əsas hərəkətverici qüvvəsinə çevrilməlidir" – Kendall hesab edir.

Emil Hüseynov
 
 
 

---