Kibervalyutanı bu yolla məşhur edirlər

"Bitcoin Grant” şirkəti müxtəlif təşkilatlara “bitcoin”lərlə onlarla və yüz minlərlə dollara ekvivalent məbləğlərdə qrantlar paylayır.

“ICTnews” xəbər xidmətinin “www.therunet.com” saytına istinadən verdiyi məlumata əsasən, əvvəllər qrantlar fəaliyyətləri “bitcoin”lərlə bağlı olan şirkətlərə verilirdi. Bu kibervalyutanın əldə edilməsi üçün avadanlıq yaradan “Avalon” şirkətinə 10 min “bitcoin” ayrılıb və şirkət onları yeni nəsil “maynerlərin” istehsalına yönəldib.

Hazırda “Bitcoin Grant” açıq çıxış kodu ilə proqram təminatı yaradan qeyri-kommersiya təşkilatlarını maliyyələşdirir. Misal üçün şirkət, “Google Android”in alternativi kimi təmənnasız paylanan “Replicant” əməliyyat sisteminin yaradıcılarına qrant ayırıb.

“Biz gündə etdiklərimizlə inandıqlarımızı birləşdirən daha mükəmməl reallıq yaratmaq istəyirik. Biz sizi məqsədlərinizə nail olmaqda maliyyə problemlərindən azad etmək istəyirik. Biz istəyirik ki, açıq çıxış kodlu proqram təminatları, hobbi yerinə, bizim can atdığımız əsas məqsəd olsun. Biz bu reallığı sizinlə birgə yaratmaq istəyirik”, - “Bitcoin Grant” saytında yazırlar.

Aynur Vəliyeva