“Microsoft”un yeni baş direktoru kim olacaq?
“Ford”un baş direktoru Alan Mallali “Microsoft”a keçəcəyi ilə bağlı şayiələrə son qoyub.
“ICTnews” xəbər xidmətinin “
www.cnews.ru” saytına istinadən verdiyi məlumata əsasən, Stiv Balmerin işinin davamçısı, çox güman ki, “Microsoft” vitse-prezidentlərindən biri olan Satya Nadella olacaq.
“Ford Motor”un baş direktoru, 68 yaşlı Alan Mallalinin ən azından 2014-cü ilin sonunadək “Microsoft” şirkətinə keçmək niyyəti yoxdur.
“Mən “Microsoft”un yeni lideri olacağımla bağlı söz-söhbətə son qoymaq istərdim. İş ondadır ki, mən “Ford”a rəhbərlik etməkdən başqa heç bir işlə məşğul olmağı planlaşdırmıram”, - deyə Mallali bildirib.
“Ford”la bağladığı sazişə əsasən, Mallali şirkətin baş direktoru vəzifəsində ən azı 2014-cü ilin sonunadək işləməlidir və Mallali xüsusən qeyd edib ki, bu razılaşmanı pozmaq niyyətində deyil.
“Ford”un başçısı “Microsoft”un rəhbərliyinin ona şirkətə rəhbərlik etmək təklifini etdiyi ilə bağlı məlumatı təsdiqləməyib. Lakin o deyib ki, bu cür şayiələr “Ford”a zərər yetirir.
Alan Mallali “Microsoft” korporasiyasının rəhbəri vəzifəsinə iki ən çox ehtimal edilən namizədlərdən biri idi. İkinci namizəd kimi göstərilən – Satya Nadella, “Microsoft Cloud and Enterprise” bölməsinin icraçı vitse-prezidentidir.
Xatırladaq ki, “Microsoft”un hazırkı başçısı Stiv Balmer 2013-cü ilin avqustunda 12 ay ərzində vəzifəsini tərk etmək niyyətində olduğunu bildirib.
Aynur Vəliyeva