İnternetdə 920 milyondan çox sayt işləyir

“Netcraft” analitik şirkəti internetdə işləyən bloq və saytların sayı haqqında fevral ayına olan statistikanı dərc edib. Şirkətin məlumatına görə, fevralın 1-dək internetdə 920 milyondan çox sayt işləyib ki, bu da ötən ayla müqayisədə 58 milyon çoxdur.

“ICTnews” elektron xəbər xidməti “cybersecurity.ru” saytına istinadən bildirir ki, veb-serverlərə gəldikdə ən yaxşı artım xidmət göstərdiyi host bazasını 48 milyon artırmış “Microsoft IIS”-də müşahidə olunub. Həmçinin xidmət göstərdiyi host bazasını 14 milyon artırmış “Nginx” açıq veb-serverində irəliləmə qeydə alınıb. Lakin “Apache” veb-serverinin  ümumi bazası 7 milyon URL azalıb.

Veb-serverlər bazarında “Microsoft”un bazar payı 3,38% artaraq 32,8% və ya 302 milyon sayt olub, “Apache”ın bazar payı 3,41% azalaraq 38,2% və ya 352 milyon sayt təşkil edib.

Emil Hüseynov
 

---