İnternetin tarixində ən güclü “DDOS”-hücum qeydə alınıb

“Cloudflare” məzmun tədarükü şəbəkəsinə tarixdə ən güclü “DDoS”-hücum həyata keçirilib. Şirkət nümayəndələri deyiblər ki, trafikin gücü 400 Qbit/s-ni ötüb.

“ICTnews” elektron xəbər xidməti “cnews.ru” saytına istinadən bildirir ki, “DDoS (Distributed Denial of Service)” hücumların məqsədi qısa müddət ərzində xeyli sayda sorğu göndərilməsi yolu ilə istifadəçilərin resursa daxil olmasının qarşısını almaqdan ibarətdir. Bu sorğular serverləri həddən artıq yükləyir və nəticədə onların işini xeyli ləngidir.

"Biz hazırda “Spamhaus”a qarşı həyata keçirilmiş hücumdan daha güclü hücuma məruz qalırıq. Öhdəsindən gəlməyə çalışırıq" – “Cloudflare”-nin baş direktoru Metyu Prays “Tvitter”də yazıb. O yazıb ki, “DDoS”-trafikin gücü 400 Qbit/s-ni ötüb.

Prays deyib ki, zərərli trafik “Cloudflare” müştərilərindən birinə qarşı həyata keçirilib. O əlavə edib ki, “Cloudflare”-nin Avropada yerləşən serverləri hücuma məruz qalıb.

“Cloudflare” şəbəkəsinə hücumun həyata keçirilməsi zamanı trafikin həcminin artırılması üçün “Network Time Protocol” (NTP) protokolundan istifadə edilib.

Emil Hüseynov

---