Azərbaycanda televiziya yayımına başlanmasından 58 il ötür

Bu gün Azərbaycanda televiziyanın ilk dəfə efir fəaliyyətinə başlamasının 58-ci ili tamam olur. Müasir dövrdə həyatımızın ayrılmaz hissəsinə çevrilən televiziya respublikada 1956-cı il fevralın 14-də yayıma başlayıb. 

İlk veriliş günü ekranda Nəcibə Məlikova görünüb və çıxışına "Göstərir Bakı!" ifadəsi ilə başlayıb. Həmin gün ekranda "Bəxtiyar" bədii filmi nümayiş etdirilib.

Əvvəllər yayım yalnız Bakı və Sumqayıtı əhatə edirdi. Bir il sonra -1957-ci ildə televiziyanın əhatə dairəsi genişlənərək Salyan, Quba, Kürdəmir, eləcə də Azərbaycanın digər rayon və şəhərlərində də yayımlandı.  
Qeyd edək ki, Azərbaycan Respublikasının ərazisində hazırda 30-a yaxın dövlət, ictimai, özəl və xarici teleradio şirkətlərinin radio-televiziya proqramları yayımlanır. Bununla yanaşı, ölkədə dövlət televiziya və radio proqramlarının əhali üzrə əhatə faizi 100 faiz, ictimai, özəl TV və radio yayımlarının əhatə faizi isə təxminən 75-80 faiz təşkil edir. Analoq yayımına paralel olaraq DVB-T rəqəmli TV yayımla ölkə əhalisinin təxminən 95-98 faizi əhatə olunub.

Bu il ölkə ərazisində rəqəmli yayım formatına tam keçidin başa çatdırılması nəzərdə tutulur.
 
 

---