Poçt xidməti operatorları qlobal elektron ticarətlə daha fəal məşğul olacaq

Poçt xidməti operatorları qlobal elektron ticarətlə daha fəal məşğul olmaq niyyətindədirlər.
 
Bu prosesə "Bali" razılaşması öz müsbət təsirini göstərərək təkan verməkdədir.
 
Belə ki, qlobal elektron ticarətin yüksəlişi vədini verən sözügedən razılaşma poçt xidmətlərini istehlakçıları dinləməyə, müştəri və satıcıların elektron kommersiya dalğasından gözləntilərini doğrultmağa, bu məsələdə maraqların təminatı üçün daha effektiv işləməyə, o cümlədən inteqrasiya edilmiş yeni poçt həlləri təklif etməyə, sadə və etibarlı gömrük və çatdırılma prosedurlarını təmin etməyə sövq edir.
 
 
BMT-nin ixtisaslaşmış qurumu olan Ümumdünya Poçt İttifaqının (ÜPİ) məlumatına görə, elektron kommersiya dalğasını vaxtında tutmaq üçün maraqlı tərəflər oyuna erkən başlamalı və prosesin inkişafı üçün koordinasiya edilmiş yanaşma qəbul edilməlidir.
 
ÜPİ-nin Baş direktoru Bişar Əbdürəhman Hüsseyn qeyd edir ki, elektron ticarət üçün  səmərəli, ağıllı və təhlükəsiz şəbəkə mühümdür: "Eyni zamanda bu proses və bütün maraqlı tərəflərin əməkdaşlığını tələb edir".
 
Xatırladaq ki, Ümumdünya Ticarət Təşkilatının (ÜTT) üzv ölkələri arasında elektron sövdələşmələrdə gömrük rüsumlarının tətbiq edilməməsinə dair cari vəziyyət 2015-ci ilədək saxlanılacaq. Bu qərar cari ilin dekabrında İndoneziyanın Bali şəhərində keçirilən ÜTT-nin 9-cu Nazirlər Konfransında qəbul edilib.
 
Həqiqət İSABALAYEVA

---