Azərbaycanda bir çox təşkilat lisenziyasız proqram istifadə etməklə vergidən yayınır

Azərbaycan Müəllif Hüquqları Agentliyi pirat proqram təminatının istifadəsinin qarşısını almaq məqsədi ilə qanunvericilikdə yeni dəyişikliklərin edilməsini təklif edir.

Agentliyin rəhbəri Kamran İmanovun sözlərinə əsasən, Azərbaycanda pirat proqram təminatının istifadə səviyyəsi MDB ölkələri ilə müqayisədə təkcə Rusiyadakından çoxdur.

“Bütün seqmentlər üzrə piratçılığın səviyyəsinin azalmasına baxmayaraq, bu sahədə proses ləng gedir. Bu, onunla bağlıdır ki, bir çox təşkilatlar qeyri-leqal proqram təminatı ilə təchiz edilmiş kompüterlər alırlar, bu da birmənalı şəkildə onların informasiya sistemlərinin təhlükəsizliyinə ziyan vurur. Bununla yanaşı, belə halda təşkilatlar proqram təminatı üzrə vergi ödənişlərindən yayınırlar, bununla ölkə büdcəsinə də ziyan vurulur. 2012-ci ilin sonuna olan məlumata əsasən, ölkəyə bu şəkildə 900 min kompüter gətirilib, bu da o deməkdir ki, hazırda ölkədə istifadə edilən 10 kompüterdən 1,5-i lisenziyalı kompüterdən istifadə edir. Bunu nəzərə alaraq biz xüsusi tədbirlər planı hazırlamışıq. Tədbirlər planına əsasən, ölkədə piratçılıqla mübarizə sahəsində qanunvericiliyin təkmilləşdirilməsi nəzərdə tutulur”,- deyə o bildirib.

K. İmanovun sözlərinə əsasən, insanlar ilk növbədə anlamalıdırlar ki, lisenziyasız proqram təminatı istifadə edərək onlar özlərini təhlükəyə atırlar.

Aynur Vəliyeva